گوگل سرچ میں بڑی تبدیلی، جیمینائی طرز کا اے آئی فیچر متعارف

ٹیکنالوجی کے عالمی ادارے گوگل نے اپنے سرچ انجن میں جدید جیمنائی طرز کے اے آئی فیچر کا باضابطہ آغاز کر دیا ہے۔ گوگل کے مطابق سرچ انجن میں موجود AI Overviews فیچر کو اب جیمنائی 3 ماڈل پر منتقل کر دیا گیا ہے، جس سے صارفین کو پہلے سے زیادہ مربوط، جامع اور مفصل جوابات فراہم کیے جا سکیں گے۔

اس کے ساتھ ہی گوگل سرچ میں ایک نئی اے آئی چیٹ ونڈو بھی متعارف کروائی جا رہی ہے، جو صارفین کو فالو اَپ سوالات پوچھنے کی سہولت دے گی۔ اس فیچر کے ذریعے صارف ایک ہی ونڈو میں تسلسل کے ساتھ مزید ذیلی سوالات بھی کر سکے گا۔

اب تک گوگل سرچ بنیادی طور پر کی ورڈز پر انحصار کرتی رہی ہے، جس کے باعث صارفین کو متعدد نتائج میں سے مطلوبہ معلومات تلاش کرنا پڑتی تھیں۔ تاہم نئی اپ ڈیٹ کے بعد صارفین گفتگو نما اور تفصیلی سرچ کے ذریعے براہِ راست معلومات حاصل کر سکیں گے، بالکل اسی انداز میں جیسے وہ جیمنائی اے آئی سے بات کر رہے ہوں۔

گوگل کے مطابق یہ فیچر گزشتہ کچھ عرصے سے محدود سطح پر آزمائشی بنیادوں پر دستیاب تھا، جسے اب عالمی سطح پر موبائل صارفین کے لیے متعارف کرایا جا رہا ہے۔

کمپنی کا کہنا ہے کہ اس اپ ڈیٹ کا مقصد سرچ کے تجربے کو مزید انٹرایکٹو، مؤثر اور انسانی گفتگو کے قریب بنانا ہے۔ ماہرین کے مطابق یہ اقدام گوگل سرچ کو محض کی ورڈز پر مبنی نظام سے آگے لے جا کر ایک جدید اے آئی اسسٹنٹ میں تبدیل کرنے کی اہم پیش رفت ہے۔