گوگل پکسل 11 سیریز سے متعلق معلومات لیک!

ٹیکنالوجی کمپنی گوگل کی نئی پکسل 11 سیریز کی باضابطہ رونمائی سے چند گھنٹے قبل ہی فلَیگ شپ اسمارٹ فون ‘پکسل 11 پرو ایکس ایل’ کی پہلی ہینڈز آن تصاویر اور ریٹیل باکس آن لائن وائرل ہو گئے ہیں۔ بلیک مارکیٹ میں فون کی موجودگی کی اطلاعات کے بعد سوشل میڈیا پلیٹ فارم ‘ایکس’ پر شیئر کی گئی ان تصاویر میں ڈارک گرے/میٹ بلیک بیک پینل، کیمرا بار اور ڈیوائس کا مجموعی ڈیزائن واضح طور پر دیکھا جا سکتا ہے۔

اگرچہ پکسل 11 پرو ایکس ایل کا ڈیزائن بڑی حد تک گزشتہ ماڈل سے مشابہ نظر آتا ہے، تاہم اس میں ایک نمایاں اور دلچسپ تبدیلی کی گئی ہے۔ وائرل تصاویر کے مطابق کیمرا بار کے اندر ایک بڑا سفید گول نشان دیکھا جا سکتا ہے، جسے رپورٹس میں گوگل کا نیا ‘ہائی لائٹ ایل ای ڈی’ (Highlight LED) قرار دیا جا رہا ہے۔ یہ ایل ای ڈی ممکنہ طور پر فون پر مختلف نوٹیفکیشنز، الرٹس اور کیمرے کے اشاروں کے لیے استعمال کی جائے گی۔ اس کے علاوہ لیک ہونے والی ریٹیل باکس کی تصویر پر ‘ڈیمو’ کا اسٹیکر اور ایک نیا ‘ڈیون’ (Dune / Coral) رنگ دکھایا گیا ہے، جو پکسل 11 سیریز کی سب سے بڑی ویژول تبدیلیوں میں شمار ہو رہا ہے۔