نوجوان لڑکی کا گوگل اور میٹا پر مقدمہ، جیوری کے لیے فیصلہ مشکل ہو گیا

لاس اینجلس: سوشل میڈیا کی لت (ایڈکشن) کے حوالے سے دنیا کے ایک انتہائی اہم مقدمے کی سماعت لاس اینجلس میں جاری ہے، جہاں جیوری نے جج کو آگاہ کیا ہے کہ وہ ٹیکنالوجی کمپنیوں کے خلاف کسی متفقہ فیصلے تک پہنچنے میں شدید مشکلات کا سامنا کر رہے ہیں۔ یہ مقدمہ عالمی شہرت یافتہ کمپنیوں گوگل اور میٹا کے خلاف ایک نوجوان خاتون کی جانب سے دائر کیا گیا ہے، جس کا موقف ہے کہ وہ کم عمری میں یوٹیوب اور انسٹاگرام کی اس حد تک عادی ہو گئی تھیں کہ اس نے ان کی زندگی کو متاثر کیا۔

رائٹرز کے مطابق، جیوری گزشتہ ایک ہفتے سے زائد عرصے سے اس حساس معاملے پر غور کر رہی ہے، تاہم تاحال یہ واضح نہیں ہو سکا کہ انہیں کس کمپنی کے حوالے سے فیصلہ کرنے میں دشواری پیش آ رہی ہے۔ صورتحال کی سنگینی کو دیکھتے ہوئے جج کیرولین بی کوہل نے جیوری کو ہدایت دی ہے کہ وہ ہر ممکن کوشش کر کے کسی نتیجے پر پہنچیں، کیونکہ فیصلہ نہ ہونے کی صورت میں مقدمے کی سماعت نئے سرے سے شروع کرنی پڑ سکتی ہے، جس سے وقت اور وسائل کا ضیاع ہوگا۔

قانونی ماہرین اس کیس کو ایک “تاریخی نظیر” قرار دے رہے ہیں۔ ان کا ماننا ہے کہ اگر جیوری ان کمپنیوں کو قصوروار ٹھہراتی ہے، تو اس کا اثر ان ہزاروں دیگر مقدمات پر پڑے گا جو دنیا بھر میں والدین اور تعلیمی اداروں کی جانب سے دائر کیے گئے ہیں۔ یہ فیصلہ مستقبل میں ٹیک کمپنیوں کی اخلاقی اور قانونی ذمہ داریوں کے تعین میں کلیدی کردار ادا کرے گا۔ فی الحال قانونی حلقوں اور ٹیکنالوجی کی دنیا کی نظریں جیوری کے اگلے اقدام پر جمی ہوئی ہیں۔