گوگل میپس کا نیا گریڈینٹ آئیکون متعارف، ڈیزائن میں نمایاں تبدیلی

گوگل نے خاموشی سے اپنی مقبول سروس گوگل میپس میں ایک دلچسپ تبدیلی متعارف کرا دی ہے جس سے زیادہ تر صارفین ابھی تک آگاہ نہیں ہو سکے۔ ٹیک ویب سائٹ کی رپورٹ کے مطابق گوگل میپس کے لیے نیا گریڈینٹ آئیکون اینڈرائیڈ اور آئی او ایس ڈیوائسز کے لیے پیش کیا جا رہا ہے۔

رپورٹ کے مطابق نیا آئیکون بھی پہلے کی طرح پن کی شکل پر مبنی ہے تاہم اس کے ڈیزائن میں نمایاں بہتری لائی گئی ہے۔ نئے آئیکون میں اوپری رنگ کو نسبتاً پتلا کر دیا گیا ہے جبکہ اندر موجود سفید دائرے کا سائز پہلے کے مقابلے میں بڑا کر دیا گیا ہے۔

ٹیک ماہرین کے مطابق گوگل نے آئیکون کے رنگوں میں بھی تبدیلی کی ہے اور اسے جیمینائی اور مصنوعی ذہانت سے متاثر گریڈینٹ رنگوں کے ساتھ ڈیزائن کیا ہے۔ ماہرین کا کہنا ہے کہ صارفین کے لیے اسے پہچاننا آسان ہوگا لیکن اس کا نیا انداز پہلے سے مختلف نظر آتا ہے۔

رپورٹ کے مطابق یہ نیا آئیکون مرحلہ وار اینڈرائیڈ صارفین کے لیے جاری کیا جا رہا ہے جبکہ آئی او ایس ڈیوائسز کے لیے اسے جلد متعارف کرائے جانے کا امکان ہے۔

واضح رہے کہ حالیہ مہینوں میں گوگل میپس میں کئی اے آئی فیچرز بھی شامل کیے گئے ہیں جن میں گوگل جیمینائی کے ذریعے براہ راست بات کرتے ہوئے نیوی گیشن سروس استعمال کرنے کی سہولت بھی شامل ہے۔