گوگل میپس میں ایک بڑی تبدیلی کیے جانے کا امکان

گوگل میپس اپنے پلیٹ فارم پر ایک ایسی تبدیلی کی آزمائش کر رہا ہے جو نیوی گیشن اور سرچنگ کے روایتی تجربے کو مکمل طور پر بدل دے گی۔ ٹیکنالوجی ویب سائٹ ‘9 ٹو 5 گوگل’ کی رپورٹ کے مطابق، اب گوگل میپس پر اکاؤنٹ لاگ ان کیے بغیر سروس استعمال کرنے والوں کو ‘لمیٹڈ ویو’ (محدود نظارہ) کا سامنا کرنا پڑے گا۔

اس نئی تبدیلی کے تحت، اگر آپ گوگل اکاؤنٹ سے لاگ ان نہیں ہیں، تو آپ میپس پر نقشہ تو دیکھ سکیں گے لیکن کئی اہم فیچرز آپ کی پہنچ سے دور ہو جائیں گے۔ ان میں قریبی کاروبار (Nearby Businesses) کی تفصیلات، اہم مقامات (Landmarks) کی لسٹنگ، اور دیگر صارفین کے دیے گئے ریویوز (User Reviews) شامل نہیں ہوں گے۔ یاد رہے کہ اب تک صارفین بغیر لاگ ان کیے بھی تقریباً تمام بنیادی فیچرز استعمال کرنے کے عادی رہے ہیں۔

اگرچہ گوگل کی جانب سے اس تبدیلی کی کوئی باضابطہ وجہ بیان نہیں کی گئی، تاہم ماہرین کا خیال ہے کہ یہ سسٹم کی کوئی عارضی خامی بھی ہو سکتی ہے۔ لیکن زیادہ قوی امکان یہی ہے کہ گوگل اب صارفین کو اپنے پلیٹ فارم پر لاگ ان ہونے کے لیے مجبور کر رہا ہے تاکہ ڈیٹا کی درستگی اور شخصی تجربے (Personalization) کو بہتر بنایا جا سکے۔ فی الحال یہ فیچر محدود صارفین میں آزمایا جا رہا ہے۔