گوگل اپنی ایپس میں وائس کمانڈز کا نیا فیچر متعارف کرانا شروع

کیلیفورنیا: عالمگیر ٹیکنالوجی کمپنی گوگل نے اپنے نئے منصوعی ذہانت (AI) ماڈل ’جیمینائی 3.5‘ کی طاقت سے اپنی بنیادی پروڈکٹیوٹی ایپس جی میل، گوگل ڈاکس اور گوگل کِیپ کے لیے نئے بیٹا وائس فیچرز متعارف کرانے کا سلسلہ شروع کر دیا ہے۔

مجموعی طور پر ’لائیو‘ (Live) کا نام دیے گئے ان جدید فیچرز کا مقصد صارفین کو بغیر کسی ٹائپنگ کے محض اپنی آواز کے ذریعے روزمرہ دفتری و ذاتی امور انجام دینے کی سہولت فراہم کرنا ہے۔ اس ٹیکنالوجی کی مدد سے صارفین جی میل میں صوتی ہدایات کے ذریعے ای میلز میں سے معلومات تلاش کر سکتے ہیں، ان نتائج کو براہِ راست گوگل کِیپ نوٹس میں محفوظ کر سکتے ہیں اور گوگل ڈاکس میں آواز کی مدد سے نئی دستاویزات شروع اور منظم کر سکتے ہیں۔

گوگل انتظامیہ کے مطابق، جی میل لائیو اور کِیپ لائیو فی الحال گوگل کے AI پلس، الٹرا اور پرو پیکیجز کے سبسکرائبرز کے لیے دستیاب ہیں، جبکہ ڈاکس لائیو کا فیچر صرف الٹرا اور پرو صارفین کے لیے جاری کیا گیا ہے۔ کمپنی کا کہنا ہے کہ یہ فیچرز عنقریب گوگل ورک اسپیس (Google Workspace) استعمال کرنے والے کاروباری و تجارتی صارفین کے لیے بھی پیش کر دیے جائیں گے تاکہ دستی ٹائپنگ کے مقابلے میں گفتگو کے انداز میں تیزی سے کام مکمل کیا جا سکے۔