گوگل کے اے آئی نے تین کمپنیوں کو ہیک کر لیا

عالمی معروف ٹیکنالوجی کمپنی ‘گوگل’ کے مصنوعی ذہانت کے ماڈل ‘جیمینائی’ (Gemini AI) نے سائبر سیکیورٹی کی صلاحیتوں کے ایک جانچ کے دوران انٹرنیٹ پر موجود عام معلومات کا استعمال کرتے ہوئے تین ویب سائٹس کے سیکیورٹی نظام کو عبور کر کے ان تک غیر متوقع رسائی حاصل کر لی۔ غیر ملکی خبر رساں ایجنسی کے مطابق یہ حیران کن واقعہ مئی میں آزاد سائبر سیکیورٹی ادارے ‘اِرریگولر’ (Irregular) کی جانب سے کی جانے والی ایک جائزہ ٹیسٹنگ کے دوران پیش آیا، جہاں جیمینائی نے آن لائن دستیاب ڈیٹا کا تجزیہ کیا اور اندازے سے حاصل کردہ کریڈینشلز (لاگ ان معلومات) کے ذریعے تین ویب سائٹس کا کنٹرول یا رسائی حاصل کی۔

گوگل کی سیکیورٹی انجینئرنگ کی نائب صدر ہیدر ایڈکنز نے واقعے کی تصدیق کرتے ہوئے بتایا کہ متاثرہ تینوں اداروں کو بروقت آگاہ کر دیا گیا تھا اور اپنے ٹریننگ پارٹنر کے ساتھ مل کر اے آئی کی ٹیسٹنگ کے طریقہ کار میں ضروری اصلاحات کر لی گئی ہیں۔ انہوں نے مزید کہا کہ یہ واقعہ اس بات کی نشاندہی کرتا ہے کہ انتہائی طاقتور اے آئی ماڈلز کو محفوظ اور ذمہ دارانہ حدود میں کام کرنے کی تربیت دینا کتنا اہم ہے۔ دوسری جانب ‘اِرریگولر’ کے ترجمان کے مطابق متعلقہ اداروں کو جولائی کے آخر میں آگاہ کیا گیا تھا اور سامنے آنے والی تمام سیکیورٹی خامیوں کو چند ہفتے قبل مکمل طور پر دور کر دیا گیا ہے۔