پاکستان کے طالب علموں کیلئے ایک برس تک گوگل جیمنائی کی سبسکرپشن فری

اسلام آباد: پاکستان میں اپنے پہلے مقامی دفتر کا باقاعدہ آغاز کرتے ہوئے بین الاقوامی ٹیکنالوجی کمپنی گوگل نے پاکستانی طلبہ کے لیے ایک بڑا اور اہم اعلان کر دیا ہے۔

تقریب سے خطاب کرتے ہوئے گوگل کے نائب صدر ولسن وائٹ نے اعلان کیا کہ کمپنی پاکستان کے تمام طلبہ کو گوگل کے جدید مصنوعی ذہانت (AI) ماڈل ‘جیمنائی’ (Google Gemini) کی ایک سالہ سبسکرپشن بالکل مفت فراہم کرے گی۔ انہوں نے بتایا کہ اس مفت سہولت کی تفصیلی اور باضابطہ رونمائی رواں ہفتے کے آخر میں متوقع ہے۔

ولسن وائٹ نے وزیراعظم شہباز شریف کے وژن کو سراہتے ہوئے کہا کہ پاکستان کو 30 ارب ڈالر کی آئی ٹی برآمدات کا مرکز بنانے کا حکومتی ہدف گوگل کے طویل المدتی مقاصد اور ترجیحات سے مکمل مطابقت رکھتا ہے۔ انہوں نے بتایا کہ گزشتہ ایک دہائی میں گوگل نے مقامی کاروباروں اور گھرانوں کے لیے 3.9 ٹریلین روپے سے زائد کی معاشی سرگرمیوں میں اہم کردار ادا کیا ہے، جبکہ گوگل کے ایکو سسٹم کے ذریعے ملک میں 9 لاکھ 60 ہزار سے زائد ملازمتوں کو مدد ملی ہے۔

گوگل کے نائب صدر کا کہنا تھا کہ پاکستان میں کمپنی کے آنے والے نئے اور وسیع منصوبوں کی یہ محض شروعات ہے۔ تقریب کے بعد وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ خواجہ نے بھی سوشل میڈیا پلیٹ فارم ایکس (X) پر جاری اپنے بیان میں گوگل کے مقامی دفتر کے قیام کا خیرمقدم کیا اور اسے ملکی تکنیکی سفر میں اہم پیشرفت قرار دیا۔