گوگل کروم میں ایسے دلچسپ فیچر کا اضافہ جو آپ کو ضرور پسند آئے گا

گوگل نے اپنے مقبول ترین ویب براؤزر ‘کروم’ کے استعمال کو مزید آسان اور منظم بنانے کے لیے دو نئے کارآمد فیچرز متعارف کرانے کا اعلان کیا ہے۔ ان میں سب سے اہم تبدیلی ‘ورٹیکل ٹیبز’ (Vertical Tabs) کا اضافہ ہے، جس کی مدد سے اب صارفین براؤزر کے اوپر موجود روایتی افقی ٹیبز کو اسکرین کے بائیں یا دائیں جانب عمودی شکل میں منتقل کر سکیں گے۔ اس فیچر کو فعال کرنے کے لیے کروم ونڈو پر رائٹ کلک کر کے ‘شو ٹیبز ورٹیکلی’ کا انتخاب کرنا ہوگا، جس سے نہ صرف ٹیبز کے مکمل ٹائٹلز پڑھنا آسان ہو جائے گا بلکہ بہت زیادہ ٹیبز کھلے ہونے کی صورت میں مطلوبہ پیج تلاش کرنا بھی سہل ہوگا۔

اس کے علاوہ گوگل نے کروم کے ‘ریڈنگ موڈ’ (Reading Mode) کو بھی اپ گریڈ کر دیا ہے، جسے اب فل پیج کی شکل دی جا رہی ہے۔ نئے اپ ڈیٹ کے بعد جب صارف کسی ویب پیج پر رائٹ کلک کر کے ‘اوپن ان ریڈنگ موڈ’ کا انتخاب کرے گا، تو اسکرین کے ایک حصے پر پیج کی تمام تصاویر غائب ہو جائیں گی اور صرف متن (Text) باقی رہے گا۔ یہ فیچر خاص طور پر ان صارفین کے لیے ڈیزائن کیا گیا ہے جو مطالعے کے دوران اپنی توجہ بھٹکنے سے بچانا چاہتے ہیں۔ ماہرین کے مطابق اگرچہ یہ تبدیلیاں بظاہر سادہ محسوس ہوتی ہیں، مگر روزمرہ انٹرنیٹ سرفنگ کے تجربے کو پہلے سے کہیں زیادہ بہتر اور منظم بنا دیں گی۔