سونے کی قیمتوں میں اضافے کا رجحان برقرار فی تولہ سونا 1100 روپے مہنگا

ملکی صرافہ مارکیٹوں میں سونے کی قیمتوں میں اضافے کا رجحان برقرار ہے، جہاں فی تولہ سونا 1100 روپے مہنگا ہو گیا ہے۔ عالمی مارکیٹ میں سونے کی فی اونس قیمت 11 ڈالر اضافے کے ساتھ 4687 ڈالر تک پہنچنے کے اثرات مقامی سطح پر بھی دیکھے گئے، جس کے بعد پاکستان میں فی تولہ سونا 4 لاکھ 91 ہزار 462 روپے کی ریکارڈ سطح پر آگیا ہے۔ اسی طرح 10 گرام سونے کی قیمت بھی 943 روپے بڑھ کر 4 لاکھ 21 ہزار 349 روپے ہو گئی ہے۔ دوسری جانب چاندی کی قیمتوں میں کمی ریکارڈ کی گئی ہے، جہاں فی تولہ چاندی 50 روپے سستی ہو کر 7,744 روپے اور 10 گرام چاندی 43 روپے کی کمی سے 6,639 روپے کی سطح پر آگئی ہے۔ عالمی منڈی میں فی اونس چاندی اس وقت 72.60 ڈالر پر ٹریڈ کر رہی ہے۔