عالمی ومقامی سطح پرسونے اور چاندی کی قیمتوں میں مسلسل اضافہ

کراچی: عالمی منڈی میں قیمتیں بڑھنے کے زیرِ اثر پاکستان میں بھی سونے اور چاندی کی قیمتوں میں اضافے کا سلسلہ تھم نہ سکا اور آج مسلسل دوسرے روز قیمتوں میں بڑا اضافہ ریکارڈ کیا گیا ہے۔ آل پاکستان صرافہ جیمز اینڈ جیولرز ایسوسی ایشن کے مطابق، ملک بھر میں 24 قیراط فی تولہ سونا 15,200 روپے مہنگا ہو کر 4 لاکھ 79 ہزار 262 روپے کی بلند ترین سطح پر پہنچ گیا ہے۔

اسی طرح 10 گرام سونے کی قیمت میں بھی 13,031 روپے کا اضافہ ہوا، جس کے بعد یہ 4 لاکھ 10 ہزار 889 روپے پر فروخت ہو رہا ہے۔ چاندی کے خریداروں کے لیے بھی خبر اچھی نہیں ہے کیونکہ فی تولہ چاندی 370 روپے مہنگی ہو کر 7,824 روپے کی ہو گئی ہے۔

عالمی سطح پر بھی سونا تاریخ کی نئی بلندیاں چھو رہا ہے، جہاں فی اونس سونا 152 ڈالر کے بڑے اضافے کے ساتھ 4,565 ڈالر کا ہو گیا ہے۔ واضح رہے کہ مقامی صرافہ بازار میں صرف دو روز کے دوران فی تولہ سونے کی قیمت میں مجموعی طور پر 31,500 روپے کا ہوشربا اضافہ ہو چکا ہے، جس نے جیولرز اور خریداروں دونوں کو حیران کر دیا ہے۔