کراچی صرافہ مارکیٹ، سونے اور چاندی کی قیمتوں میں تین روزہ کمی کے بعد بڑا اضافہ

کراچی صرافہ مارکیٹ میں مسلسل تین روز تک جاری رہنے والا کمی کا سلسلہ تھم گیا ہے، اور ملک بھر میں سونے اور چاندی کی قیمتوں میں نمایاں اضافہ ریکارڈ کیا گیا ہے۔

آل پاکستان جیمز اینڈ جیولرز ایسوسی ایشن کے مطابق کراچی کی صرافہ مارکیٹ میں فی تولہ سونا 4,300 روپے کے اضافے سے 441,636 روپے کا ہو گیا ہے۔ اسی طرح 10 گرام سونے کی قیمت میں 3,686 روپے کا اضافہ ہوا، جس کے بعد نئی قیمت 378,631 روپے پر پہنچ گئی ہے۔

بین الاقوامی مارکیٹ میں بھی قیمتی دھاتوں کے نرخ اوپر گئے ہیں، جہاں عالمی منڈی میں فی اونس سونا 43 ڈالر مہنگا ہو کر 4,191 ڈالر کا ہو گیا ہے۔ دوسری جانب مقامی صرافہ بازار میں چاندی کی قیمت میں بھی تیزی دیکھی گئی ہے، جہاں چاندی کی فی تولہ قیمت 20 روپے بڑھ کر 6,578 روپے ہو گئی ہے۔