پاکستان سمیت دنیا بھر میں سونے اور چاندی کی قیمتوں میں کمی

پاکستان سمیت عالمی مارکیٹ میں سونے اور چاندی کی قیمتوں میں نمایاں کمی ریکارڈ کی گئی ہے۔

بین الاقوامی مارکیٹ کے مطابق 24 قیراط فی تولہ سونا 8 ہزار 700 روپے سستا ہو کر 5 لاکھ 24 ہزار 562 روپے کا ہو گیا ہے، جبکہ 10 گرام سونے کی قیمت 7 ہزار 459 روپے کمی کے بعد 4 لاکھ 49 ہزار 727 روپے ہو گئی ہے۔

اسی طرح 24 قیراط فی تولہ چاندی کی قیمت میں بھی 310 روپے کمی ریکارڈ کی گئی جس کے بعد چاندی 8 ہزار 541 روپے فی تولہ پر آ گئی ہے۔

عالمی مارکیٹ میں بھی سونے کی قیمت میں کمی دیکھنے میں آئی ہے جہاں فی اونس سونا 87 ڈالر سستا ہو کر 5 ہزار 18 ڈالر پر آ گیا ہے۔

ذرائع کے مطابق مقامی سطح پر گزشتہ تین روز کے دوران فی تولہ سونا مجموعی طور پر 18 ہزار 700 روپے تک سستا ہو چکا ہے، جس کے باعث سرمایہ کاروں اور خریداروں کی توجہ دوبارہ سونے کی مارکیٹ کی طرف مبذول ہو رہی ہے۔