عالمی و مقامی سطح پر سونے کی قیمتوں میں ایک بار پھر کمی

کراچی: عالمی مارکیٹ کے نقشِ قدم پر چلتے ہوئے پاکستان کی مقامی صرافہ مارکیٹوں میں بھی سونے اور چاندی کی قیمتوں میں غیر معمولی کمی ریکارڈ کی گئی ہے۔ 24 قیراط فی تولہ سونا 11 ہزار روپے سستا ہونے کے بعد 4 لاکھ 68 ہزار 262 روپے کی سطح پر آ گیا ہے۔

اسی طرح 10 گرام سونے کی قیمت میں 9,430 روپے کی کمی دیکھی گئی، جس کے بعد یہ 4 لاکھ 1 ہزار 459 روپے پر پہنچ گیا ہے۔ سونے کے ساتھ ساتھ چاندی کی قیمتوں میں بھی مندی کا رجحان رہا، جہاں 24 قیراط فی تولہ چاندی 340 روپے کی کمی کے بعد 7,484 روپے پر آگئی ہے۔

مارکیٹ ذرائع کے مطابق، اس بڑی کمی کی بنیادی وجہ انٹرنیشنل مارکیٹ میں سونے کی قیمتوں کا گرنا ہے، جہاں فی اونس سونا 110 ڈالر کی کمی کے بعد 4,455 ڈالر پر آ گیا ہے۔ عالمی مارکیٹ میں ہونے والی اس بڑی تبدیلی کے براہِ راست اثرات مقامی مارکیٹ پر بھی مرتب ہوئے ہیں، جس سے خریداروں کو عارضی ریلیف ملا ہے۔