پانچ ماہ میں ایئرپورٹس سے 30 کروڑ 60 لاکھ روپے مالیت کا سونا اور چاندی ضبط

ملکی ایئرپورٹس پر کسٹم حکام نے گزشتہ پانچ ماہ کے دوران مجموعی طور پر 30 کروڑ 60 لاکھ روپے مالیت کا سونا اور چاندی ضبط کر لیا۔ ایف بی آر کے مطابق پاکستان کسٹمز نے کارروائیوں کے دوران 2.73 کلوگرام سونا اور 359 کلوگرام چاندی پکڑی ہے۔

ایف بی آر کے اعلامیے میں کہا گیا ہے کہ ملک میں چاندی کی اسمگلنگ کے واقعات میں نمایاں اضافہ ریکارڈ کیا گیا ہے۔ حکام کے مطابق چاندی کی درآمدات اسٹیٹ بینک آف پاکستان اور وزارتِ تجارت کی مقررہ قواعد و ضوابط کے تحت ہوتی ہیں، لیکن حالیہ مہینوں میں قواعد کو بائی پاس کرنے کی کوششوں میں اضافہ دیکھا گیا ہے۔

ایف بی آر نے بتایا کہ گزشتہ دس ماہ کے دوران عالمی اور مقامی مارکیٹ میں چاندی کی قیمت دوگنا سے زیادہ بڑھ چکی ہے، جس کے باعث اسمگلنگ کا رجحان بھی بڑھا ہے۔ ادارے کا کہنا ہے کہ قیمتوں میں تیزی سے اضافے نے غیر قانونی تجارت کو مزید منافع بخش بنا دیا ہے۔

اعلامیے میں کہا گیا ہے کہ ایف بی آر اور پاکستان کسٹمز اسمگلنگ کی روک تھام اور قومی معیشت کے تحفظ کے لیے پرعزم ہیں اور ایئرپورٹس سمیت سرحدی مقامات پر نگرانی مزید سخت کردی گئی ہے۔