’اپنی بات مہذب انداز میں بھی کہی جا سکتی ہے‘، گوہر رشید نے عورت مارچ کے طریقۂ کار پر اعتراض اٹھا دیا

معروف پاکستانی اداکار گوہر رشید نے ایک حالیہ پوڈکاسٹ میں گفتگو کرتے ہوئے کہا ہے کہ خواتین کے حقوق اور سنگین مسائل پر بات چیت کے دوران اظہار کا طریقہ کار ہمیشہ مہذب اور شائستہ ہونا چاہیے۔ انہوں نے فلموں میں آئٹم نمبرز اور عورت مارچ کے کچھ نامناسب پوسٹرز پر ایک ساتھ تنقید کرتے ہوئے کہا کہ اگر خواتین کو ‘سیکس ابجیکٹ’ (جنسی شے) کے طور پر پیش کرنا غلط ہے تو حقوق کی جدوجہد میں بھی فحش یا غیر مناسب تاثر دینے والے انداز سے گریز کرنا چاہیے۔ اداکار کے اس بیان کے بعد سوشل میڈیا پر ایک نئی بحث چھڑ گئی ہے، جہاں کچھ صارفین نے ان کی تائید کرتے ہوئے پوسٹرز کے انداز پر سوال اٹھائے، جبکہ دیگر نے موقف اختیار کیا کہ معاشرے کو عورت مارچ کے نعروں کے ساتھ ساتھ خواتین پر تشدد اور بچوں کے ساتھ زیادتی جیسے تلخ و سنگین مسائل پر بھی اتنی ہی شدت سے آواز اٹھانی چاہیے۔