گوہر رشید کی عورت مارچ کے بعض پوسٹرز پر تنقید

پاکستان کے معروف اداکار گوہر رشید نے ایک حالیہ پوڈکاسٹ میں گفتگو کرتے ہوئے عورت مارچ کے بعض نعروں، پوسٹرز اور فلموں میں آئٹم نمبرز کے رجحان پر اپنے تحفظات کا اظہار کیا ہے۔ انہوں نے کہا کہ خواتین کے حقوق اور ان کے مسائل کے لیے آواز اٹھانا انتہائی ضروری ہے، تاہم اس کا اظہار ہمیشہ شائستہ اور مہذب انداز میں ہونا چاہیے۔ گوہر رشید نے مزید کہا کہ وہ فلموں میں آئٹم نمبرز کے سخت خلاف ہیں کیونکہ ایسے گانے خواتین کو محض ایک شے کے طور پر پیش کرتے ہیں، اور اسی طرح عورت مارچ میں بھی کئی پوسٹرز کا انداز غیر مناسب ہوتا ہے۔ اداکار کے اس بیان پر سوشل میڈیا صارفین کی جانب سے ملا جلا ردِعمل سامنے آیا ہے، جہاں کچھ لوگ ان کی حمایت کر رہے ہیں تو کچھ صارفین ان کی رائے سے اختلاف کرتے دکھائی دیتے ہیں۔