پاک افغان جھڑپوں پر شدید تشویش، چین، برطانیہ اور روس کا تحمل کا مشورہ

اسلام آباد: پاکستان اور افغانستان کے درمیان جاری جھڑپوں پر عالمی برادری نے گہری تشویش کا اظہار کرتے ہوئے دونوں ممالک سے فوری کشیدگی کم کرنے کا مطالبہ کیا ہے۔

چین کی وزارت خارجہ کے ترجمان نے کہا کہ دونوں ممالک تحمل کا مظاہرہ کریں اور اختلافات کو بات چیت اور مذاکرات کے ذریعے حل کریں۔ چین نے فوری طور پر لڑائی روکنے اور کشیدگی کم کرنے کے اقدامات پر زور دیا۔

برطانیہ کے وزیر خارجہ نے بھی دونوں فریقوں پر زور دیا کہ وہ صورتحال کو مزید بگاڑنے سے گریز کریں اور فوری اقدامات کے ذریعے تناؤ کم کریں۔

روس کی وزارت خارجہ نے خبردار کیا کہ پاکستان اور افغانستان خطرناک تصادم سے اجتناب کریں اور اپنے اختلافات سیاسی و سفارتی ذرائع سے حل کریں۔

ادھر ایران نے دونوں ممالک کے درمیان ثالثی کی پیشکش کرتے ہوئے کہا ہے کہ وہ مذاکرات میں سہولت کاری کے لیے ہر ممکن تعاون کو تیار ہے۔

ملائیشیا کے وزیراعظم انور ابراہیم نے بھی فوجی کارروائیاں فوری روکنے کا مطالبہ کیا اور کہا کہ پاکستان کے سیکیورٹی خدشات اپنی جگہ اہم ہیں جبکہ افغانستان کی خودمختاری اور سالمیت کا احترام بھی ضروری ہے۔