مشرقِ وسطیٰ تنازع، تیل کی قیمت پھر سے 100 ڈالر فی بیرل سے تجاوز کر گئی

مشرقِ وسطیٰ میں ایران، امریکہ اور اسرائیل کے درمیان بڑھتی ہوئی فوجی کشیدگی کے باعث عالمی منڈی میں خام تیل کی قیمتوں میں اچانک اور بڑا اضافہ ریکارڈ کیا گیا ہے۔ بحران کی سنگینی کے باعث برینٹ کروڈ آئل کی قیمت 3 فیصد اضافے کے ساتھ 103.29 ڈالر فی بیرل کی سطح سے تجاوز کر گئی ہے۔ اسی طرح امریکی خام تیل (WTI) کی قیمت میں بھی 3.71 ڈالر کا نمایاں اضافہ ہوا ہے، جس کے بعد یہ تقریباً 99 ڈالر فی بیرل تک پہنچ گیا ہے۔

معاشی ماہرین کا کہنا ہے کہ آبنائے ہرمز (Strait of Hormuz) کے بلاک ہونے کے خدشات اور خطے میں توانائی کی تنصیبات پر حملوں نے سپلائی چین کو بری طرح متاثر کیا ہے۔ انٹرنیشنل انرجی ایجنسی (IEA) نے اسے تیل کی عالمی مارکیٹ کی تاریخ کا سب سے بڑا سپلائی تعطل قرار دیا ہے۔ اگر یہ تنازع طویل ہوتا ہے تو خام تیل کی قیمتیں 120 سے 150 ڈالر تک جانے کا خدشہ ہے، جس سے عالمی سطح پر مہنگائی کا ایک نیا طوفان آ سکتا ہے۔