آئی ایم ایف اگلے 14 ماہ میں پاکستان کو مزید 3.6 ارب ڈالر قرض دے گا

عالمی مالیاتی فنڈ (آئی ایم ایف) آئندہ 14 ماہ کے دوران پاکستان کو مزید 3 ارب 60 کروڑ ڈالر کا قرض فراہم کرے گا۔ آفیشل دستاویزات کے مطابق، پاکستان کے لیے جاری آئی ایم ایف کے ایکسٹنڈڈ فنڈ فسیلیٹی (EFF) اور ریزیلینس اینڈ سسٹین ایبلٹی فسیلیٹی (RSF) پروگرامز کی مجموعی مالیت 8 ارب 40 کروڑ ڈالر ہے، جس میں سے پاکستان اب تک 4 ارب 80 کروڑ ڈالر حاصل کر چکا ہے اور بقیہ 3 ارب 60 کروڑ ڈالر اگلے 14 ماہ میں مرحلہ وار جاری کیے جائیں گے۔ ذرائع کا کہنا ہے کہ ان دونوں پروگرامز کے تحت اگلا (چوتھا) اقتصادی جائزہ رواں سال ستمبر میں متوقع ہے، جس کے لیے آئی ایم ایف کا ایک اعلیٰ سطح کا مشن پاکستان کا دورہ بھی کر سکتا ہے۔

دستاویزات کے مطابق، ستمبر 2027 تک ای ایف ایف (EFF) کے تحت مجموعی طور پر 7 ارب ڈالر جاری کیے جائیں گے، جبکہ ماحولیاتی تبدیلیوں کے اثرات سے نمٹنے کے لیے آر ایس ایف (RSF) پروگرام کے تحت 1 ارب 40 کروڑ ڈالر ملیں گے۔ آئی ایم ایف نے قرض کی فراہمی کو سخت شرائط سے مشروط کرتے ہوئے مالیاتی نظم و ضبط برقرار رکھنے، بجٹ خسارہ کم کرنے، ٹیکس ریونیو میں اضافے اور ٹیکس نظام میں فوری اصلاحات پر زور دیا ہے۔ اس کے علاوہ توانائی کے شعبے میں اصلاحات، گردشی قرضے میں کمی، خسارے میں چلنے والے سرکاری اداروں کی نجکاری، ملکی قرضوں کو پائیدار سطح پر لانے اور مہنگائی میں کمی کے لیے اقدامات بھی ان پروگرامز کا لازمی حصہ ہیں۔ ساتھ ہی پاکستان کو ماحولیاتی تبدیلی، سیلاب اور خشک سالی جیسے شدید خطرات سے نمٹنے کے لیے ٹھوس اصلاحاتی اقدامات کرنے ہوں گے۔