عمران خان اور جمائمہ کا برطانوی گھر برائے فروخت

برطانیہ کے علاقے رچمنڈ میں واقع وہ تاریخی گھر جہاں پاکستان کے سابق وزیراعظم اور بانی پی ٹی آئی عمران خان اپنی سابقہ اہلیہ جمائمہ خان اور ان کی والدہ لیڈی اینابیل گولڈ اسمتھ کے ساتھ شادی کے دوران اور طلاق کے بعد کئی برسوں تک مقیم رہے، مارکیٹ میں فروخت کے لیے پیش کر دیا گیا ہے۔ اس پرتعیش جائیداد کی طلب کردہ قیمت 2 کروڑ 50 لاکھ پاؤنڈز (25 ملین پاؤنڈز) مقرر کی گئی ہے۔

’اورملی لاج‘ کے نام سے معروف یہ 10 بیڈ رومز پر مشتمل شاندار اور الگ تھلگ پراپرٹی جنوب مغربی لندن کے علاقے رچمنڈ میں ’ہیم کامن‘ پر رچمنڈ پارک کے بالکل قریب واقع ہے۔ پراپرٹی کی سرکاری تفصیلات کے مطابق، جارجین دورِ حکومت کے ابتدائی دنوں کا یہ تاریخی گھر تقریباً 15 ہزار 814 مربع فٹ رقبے پر پھیلا ہوا ہے، جس میں 10 بیڈ رومز کے علاوہ 7 باتھ رومز، وسیع و عریض باغات اور ایک خوبصورت کاٹیج بھی شامل ہے۔ یہ گھر پاکستانی سیاست کے لحاظ سے بھی تاریخی اہمیت کا حامل ہے، کیونکہ یہ وہی مقام ہے جہاں موجود رہ کر عمران خان نے 2006 میں پاکستان میں آنے والے بدترین سیلاب کی تباہ کاریوں کے بعد بین الاقوامی سطح پر فنڈز اکٹھے کرنے کے لیے باقاعدگی سے شوز اور خصوصی پیغامات ریکارڈ کروائے تھے۔