گلوبل فلم انڈسٹری کا سنہرا سال، باکس آفس کمائی 34 ارب ڈالر

رواں سال گلوبل فلم انڈسٹری نے شاندار کاروبار کرتے ہوئے باکس آفس پر تاریخ رقم کر دی، عالمی سطح پر فلموں کی مجموعی کمائی 34 ارب ڈالر تک پہنچ گئی۔

بہتی گنگا میں ہاتھ دھوتے ہوئے امریکی صدر ڈونلڈ ٹرمپ نے ہالی ووڈ کو تحفظ دینے کے لیے غیر ملکی فلموں پر 100 فیصد ٹیرف عائد کر دیا، جسے امریکی فلم انڈسٹری کے لیے ایک بڑا ریلیف قرار دیا جا رہا ہے۔

سال کی سب سے بڑی فلمی تقریب آسکر ایوارڈز میں فلم آنورا چھائی رہی، جس نے بہترین فلم اور بہترین ہدایتکار سمیت مجموعی طور پر 5 آسکر ایوارڈز اپنے نام کیے۔

عالمی باکس آفس پر سب سے بڑی کامیابی چین کی اینیمیٹڈ فلم نی ژا ٹو کے حصے میں آئی، جس نے ایک ارب 90 کروڑ ڈالر کما کر ہالی ووڈ کی بڑی فلموں کو بھی پیچھے چھوڑ دیا۔

ڈزنی کی اینیمیٹڈ فلم لیلو اینڈ اسٹچ نے بھی ایک ارب ڈالر سے زائد کمائی کی، تاہم سپر اسٹارز کی کوئی لائیو ایکشن فلم ایک ارب ڈالر کا ہندسہ عبور نہ کر سکی۔

ادھر فلسطینی شہید بچی ہند رجب پر بننے والی فلم دی وائس آف ہند رجب نے فلم فیسٹیول میں جذباتی منظر پیش کیا، جہاں ناظرین نے 24 منٹ تک تالیاں بجا کر نیا عالمی ریکارڈ قائم کر دیا۔

ہالی ووڈ ایکشن کے حوالے سے ٹام کروز ایک بار پھر نمایاں رہے، فلم مشن امپاسیبل: دی فائنل ریکننگ میں خطرناک ایکشن مناظر کے ساتھ نظر آئے، جبکہ یہ فلم باکس آفس پر سال کی ٹاپ 10 فلموں میں شامل رہی۔