شاہ رخ خان کی اہلیہ نے 100 سال پرانے آبائی گھر کو لگژری ریزورٹ بنا دیا

بالی وڈ کے سپر اسٹارشاہ رخ خان کی اہلیہ اور معروف انٹیریئر ڈیزائنر Gauri Khan نے اپنے تقریباً 100 سال پرانے آبائی گھر کو لگژری ریزورٹ میں تبدیل کر دیا ہے، جہاں ایک رات قیام کے چارجز تقریباً ایک لاکھ 20 ہزار روپے تک ہو سکتے ہیں۔

یہ حقیقت ہے کہ گوری خان ایک سپر اسٹار کی اہلیہ ہیں، مگر انہوں نے ہمیشہ اپنی الگ شناخت برقرار رکھی۔ انٹیریئر ڈیزائننگ کے شعبے میں انہوں نے نمایاں مقام حاصل کیا اور کئی مشہور شخصیات کے گھروں کو خوبصورتی سے آراستہ کیا۔

گوری خان نے ممبئی میں واقع اپنے گھر “منت” کی تزئین و آرائش میں بھی اپنی مہارت کا مظاہرہ کیا، جہاں وہ شاہ رخ خان اور بچوں کے ساتھ رہائش پذیر ہیں۔

حال ہی میں انہوں نے ایک نہایت ذاتی نوعیت کے منصوبے پر کام کرتے ہوئے 1933ء کی اپنی خاندانی جائیداد کو ازسرِنو تعمیر کیا۔ یہ 6 بیڈرومز پر مشتمل ولا خوبصورت پہاڑی مقام Dalhousie میں واقع ہے۔

میڈیا رپورٹس کے مطابق یہ تاریخی خاندانی گھر اب ایک لگژری ریزورٹ کی شکل اختیار کر چکا ہے، جہاں سیاح دلکش پہاڑی مناظر کے ساتھ قیام کر سکتے ہیں۔ یہ وہی مقام ہے جہاں گوری خان نے بچپن میں اپنے خاندان اور کزنز کے ساتھ گرمیوں کی چھٹیاں گزاریں۔

گوری خان کی کزن رستم تیواری نے اس منصوبے میں ان کے ساتھ کام کیا، جبکہ یہ جائیداد ان کے ماموں تیجندر تیواری کی ملکیت ہے۔

یہ منصوبہ نہ صرف خاندانی یادوں کی تجدید ہے بلکہ گوری خان کی تخلیقی صلاحیتوں اور انفرادی شناخت کا بھی مظہر ہے۔