گوہر خان نے اپنا ڈوپلیکس فلیٹ کروڑوں روپے میں فروخت کردیا، 88 فیصد منافع کمایا

بالی ووڈ کی معروف اداکارہ اور ماڈل گوہر خان نے ممبئی کے مہنگے اور پوش علاقے ورسووا میں واقع اپنا شاندار ڈوپلیکس فلیٹ 6 کروڑ 1 لاکھ بھارتی روپوں میں فروخت کر دیا ہے۔ بھارتی میڈیا رپورٹس کے مطابق 43 سالہ اداکارہ نے 2 ہزار 340 مربع فٹ پر محیط یہ اپارٹمنٹ سنہ 2014ء میں 3 کروڑ 20 لاکھ بھارتی روپوں میں خریدا تھا، جس کے بعد اس پراپرٹی کی قیمت میں تقریباً 88 فیصد کا شاندار اضافہ دیکھنے میں آیا ہے۔ رجسٹری دستاویزات کے مطابق اس سودے پر خریداروں نے 36 لاکھ 6 ہزار روپے اسٹامپ ڈیوٹی ادا کی ہے۔

رپورٹ کے مطابق ممبئی کے ساحلی علاقوں ورسووا، جوہو، لوکھنڈوالا اور باندرہ میں حالیہ عرصے کے دوران بھارتی فلم و ڈرامہ انڈسٹری کی متعدد معروف شخصیات نے اربوں روپے کی جائیدادوں کی خرید و فروخت کی ہے۔ اس سے قبل جولائی 2026ء میں بھارتی کرکٹر ویرات کوہلی اور ان کی اہلیہ و اداکارہ انوشکا شرما نے بھی ورسووا کے گودریج اسکائی شور پروجیکٹ میں 43 کروڑ روپے سے زائد مالیت کے اپارٹمنٹس خریدے تھے، جبکہ اداکار رندیپ ہوڈا نے بھی اسی علاقے میں 5 کروڑ 63 لاکھ روپے کا فلیٹ خریدا تھا، جو ممبئی کے ریئل اسٹیٹ سیکٹر میں شوبز اور اسپورٹس اسٹارز کی بڑھتی ہوئی سرمایہ کاری کو ظاہر کرتا ہے۔