مسافر طیارے کے باتھ روم کا نلکا اچانک خراب، جہاز میں پانی پھیل گیا

امریکا میں فرنٹیئر ایئرلائنز کی ڈینور سے ڈیٹرائٹ جانے والی مسافر پرواز دورانِ سفر باتھ روم کے واش بیسن کا نل اچانک خراب ہونے کے باعث سنگین مشکل سے دوچار ہو گئی، جس کے نتیجے میں طیارے کے اندر پانی پھیل گیا۔ امریکی نشریاتی ادارے سی بی ایس کے مطابق جہاز کے اگلے حصے میں موجود باتھ روم سے پانی تیزی سے بہتے ہوئے مسافر کیبن کے فرش اور گزرگاہ تک پھیل گیا اور تالاب کا منظر پیش کرنے لگا، جس پر مسافروں نے شدید برہمی کا اظہار کیا۔ صورتحال کی سنگینی کے پیشِ نظر پائلٹ نے فضائی ٹریفک کنٹرول کو ہنگامی پیغام دیتے ہوئے آگاہ کیا کہ پانی کی بڑی مقدار طیارے کے برقی نظام کو نقصان پہنچا سکتی ہے، جس کے بعد شکاگو کے اوہیر ہوائی اڈے پر ہنگامی لینڈنگ کی اجازت طلب کی گئی۔ رپورٹ کے مطابق طیارے میں سوار ایک مسافر پلمبر نے پانی کا بہاؤ روکنے میں مدد کی تاہم کیبن کا فرش بھیگ جانے کے باعث پرواز کا رخ تبدیل کر دیا گیا، جبکہ فرنٹیئر ایئرلائنز نے تصدیق کی ہے کہ طیارہ بحفاظت اتر گیا، تمام مسافر و عملہ محفوظ رہے اور بعد ازاں مسافروں کو متبادل طیارے کے ذریعے منزلِ مقصود کی جانب روانہ کر دیا گیا۔