فرانسیسی اداکارہ بریژیت باغدو 91 برس کی عمر میں انتقال کر گئیں

فرانسیسی اداکارہ بریژیت باغدو، جو فرانس میں محبت سے “بی بی” کے نام سے جانی جاتی تھیں، 91 برس کی عمر میں انتقال کر گئیں۔ ان کے انتقال کی تصدیق بریژیت باغدو فاؤنڈیشن نے امریکی نشریاتی ادارے سی این این کو جاری بیان میں کی ہے۔

بریژیت باغدو نے 1950 اور 1960 کی دہائی میں اپنی جرات مندانہ اور بے باک اداکاری کے باعث عالمی شہرت حاصل کی۔ وہ 1952 سے 1973 تک متعدد فرانسیسی فلموں میں جلوہ گر ہوئیں اور اپنی اداکاری کے ذریعے خواتین کی آزادی، خودمختاری اور سماجی روایات پر کھل کر اظہارِ خیال کیا۔

39 برس کی عمر میں اداکاری کو خیرباد کہنے کے بعد بریژیت باغدو نے اپنی زندگی جانوروں کے حقوق کے لیے وقف کر دی۔ انہوں نے اپنی فاؤنڈیشن کے ذریعے دنیا بھر میں تحفظِ حیوانات کے لیے سرگرم کردار ادا کیا اور اس حوالے سے عالمی سطح پر پہچان حاصل کی۔

28 ستمبر 1934 کو پیرس میں پیدا ہونے والی بریژیت باغدو نے فلم، موسیقی اور فیشن کی دنیا پر گہرے اثرات چھوڑے۔ انہیں 20ویں صدی کی بااثر ترین ثقافتی شخصیات میں شمار کیا جاتا ہے، اور ان کی خدمات کو طویل عرصے تک یاد رکھا جائے گا۔