لاہور: سابق ٹیسٹ کرکٹر محمد الیاس جگر کے کینسر میں مبتلا، سرجری متوقع

سابق ٹیسٹ کرکٹر محمد الیاس جگر کے کینسر میں مبتلا ہو گئے ہیں۔ ذرائع کے مطابق ان کی مقامی اسپتال میں سرجری کی جائے گی۔ سابق کرکٹر نے کامیاب آپریشن کے لیے قوم سے دعاؤں کی اپیل کی ہے۔

79 سالہ محمد الیاس پاکستان کی جانب سے 10 ٹیسٹ میچز کھیل چکے ہیں جبکہ انہوں نے 82 فرسٹ کلاس میچز میں بھی حصہ لیا۔ کرکٹ کے میدان کے علاوہ وہ پاکستان کرکٹ بورڈ میں چیف سلیکٹر کے فرائض بھی انجام دے چکے ہیں۔

محمد الیاس قومی سلیکشن کمیٹی کے رکن رہنے کے ساتھ ساتھ جونیئر سلیکشن کمیٹی اور ویمن کرکٹ سلیکشن کمیٹی کے سربراہ بھی رہ چکے ہیں۔ اس مشکل وقت میں سابق کرکٹر نے پی سی بی سے مدد کی اپیل بھی کی ہے۔