ملک کے مغربی و شمالی علاقوں میں بارش اور پہاڑوں پر برف باری کی پیشگوئی، محکمہ موسمیات

محکمہ موسمیات نے رواں ہفتے ملک کے مغربی اور شمالی علاقوں میں بارش اور پہاڑوں پر برف باری کی پیشگوئی کی ہے، جبکہ میدانی علاقوں میں دھند کی شدت بڑھنے کا امکان ظاہر کیا ہے۔

محکمہ موسمیات کے مطابق 12 دسمبر کی رات ایک کمزور مغربی ہواؤں کا سلسلہ ملک میں داخل ہوگا، جو بالائی علاقوں میں بارش اور برف باری کا سبب بنے گا۔ چترال، سوات، دیر، شانگلہ، کوہستان، مانسہرہ، ہنزہ، گلگت، اسکردو اور کشمیر میں 13 سے 15 دسمبر کے دوران بارش اور برف باری متوقع ہے۔

14 اور 15 دسمبر کو باجوڑ، مہمند، خیبر، کرم، وزیرستان، کوئٹہ، زوب اور شیرانی سمیت دیگر علاقوں میں ہلکی بارش یا برف باری ہونے کا امکان ہے۔ اسی طرح اسلام آباد، راولپنڈی، پشاور، مری اور گلیات میں بھی ہلکی بارش یا ہلکی برف باری کی پیشگوئی کی گئی ہے۔

پنجاب، خیبر پختونخوا اور سندھ کے میدانی علاقوں میں 12 سے 16 دسمبر تک گھنی دھند چھائے رہنے کا امکان ہے، جس سے ٹریفک اور فضائی نظام متاثر ہو سکتا ہے۔

محکمہ موسمیات کا کہنا ہے کہ 19 دسمبر سے ایک اور مغربی سسٹم ملک کے بالائی علاقوں کو متاثر کرے گا، جس کے نتیجے میں مزید بارش اور برف باری کے امکانات موجود ہیں۔