’’میں نہیں بدلی‘‘، معافی کے بعد فضا علی کی نئی ویڈیو پر پھر بحث چھیڑ دی

لاہور: اداکارہ اور ٹی وی میزبان فضا علی ایک بار پھر سوشل میڈیا پر موضوع بحث بن گئی ہیں، جہاں ان کی نئی ویڈیو نے ایک مرتبہ پھر صارفین کی توجہ حاصل کر لی ہے۔

فضا علی کی جانب سے شیئر کی گئی ویڈیو میں ان کے شوہر انہیں کندھے پر اٹھائے ہوئے نظر آ رہے ہیں، جو اس سے قبل بھی تنازع کا باعث بن چکا ہے۔

ویڈیو کے ساتھ انہوں نے ایک جذباتی پیغام بھی تحریر کیا، جس میں کہا گیا کہ ’’جنہیں میرا اٹھایا جانا بھاری لگا تھا۔۔ آج لندن میں وہی منظر ہلکا لگ رہا ہے۔ نہ میں بدلی ہوں، نہ محبت، صرف نظروں کا وزن کم ہو گیا۔ اب بتاؤ۔۔ بوجھ کس پر تھا؟‘‘

یاد رہے کہ اس سے قبل ایک نجی ٹی وی پروگرام کے دوران بھی ان کے شوہر نے لائیو نشریات میں انہیں کندھے پر اٹھایا تھا، جس پر شدید ردعمل سامنے آیا تھا اور متعلقہ ادارے کی جانب سے چینل کو نوٹس بھی جاری کیا گیا تھا۔

نئی ویڈیو کے بعد ایک بار پھر سوشل میڈیا پر مختلف آرا سامنے آ رہی ہیں، جہاں کچھ صارفین اسے ذاتی معاملہ قرار دے رہے ہیں جبکہ بعض اسے غیر مناسب رویہ قرار دے رہے ہیں۔