جعلی شناختی دستاویزات کا اسکینڈل, نادرا اور پاسپورٹ افسران کے خلاف ایف آئی اے کی تحقیقات، 42 کیسز میں اہم انکشافات

جعلی دستاویزات کی تیاری اور غیر قانونی شناختی کارڈز و پاسپورٹس کے اجراء کے معاملے پر فیڈرل انویسٹی گیشن ایجنسی (FIA) نے نادرا (NADRA) اور پاسپورٹ آفس کے افسران کے خلاف جاری تحقیقات کے دائرہ کار کو مزید وسیع کر دیا ہے۔

اسلام آباد سے موصول ہونے والی تفصیلات کے مطابق ایف آئی اے اس وقت 42 مختلف کیسز کی تفتیش کر رہی ہے، جن میں نادرا اور پاسپورٹ آفس کے اہلکار، افسران اور ان کے سہولت کار (فرنٹ مین) بلاواسطہ طور پر ملوث پائے گئے ہیں۔

تفتیشی ذرائع کے مطابق ان کیسز میں سب سے اہم اور سنگین انکشاف یہ سامنے آیا ہے کہ نادرا افسران نے ملی بھگت سے متعدد افغان شہریوں کو پاکستانی شہریوں کے فیملی ٹری (Family Tree) میں غیر قانونی طور پر شامل کیا۔ اس کے علاوہ رشوت اور جعلسازی کے ذریعے جعلی شناختی دستاویزات اور پاسپورٹس کا اجراء بھی کیا گیا۔

ایف آئی اے حکام کا کہنا ہے کہ ان کیسز میں ملوث تمام اہلکاروں اور ان کے فرنٹ مینز کے خلاف کارروائی جاری ہے اور تحقیقات مکمل ہونے کے بعد قانونی چارہ جوئی عمل میں لائی جائے گی۔