لیبیا کشتی حادثہ: جج کی ملزم کی ضمانت کی درخواست پر سماعت سے معذرت

لاہور ہائیکورٹ میں لیبیا کشتی حادثے کے مقدمے میں گرفتار ملزم شفاقت علی کی بعد از گرفتاری درخواستِ ضمانت پر سماعت کے دوران جسٹس غلام سرور نہنگ نے کیس سننے سے معذرت کر لی ہے اور فائل چیف جسٹس لاہور ہائیکورٹ کو ارسال کر دی ہے تاکہ اسے کسی دوسرے بینچ کے سامنے مقرر کیا جا سکے۔ سماعت کے دوران فاضل جج نے واضح کیا کہ چونکہ وہ لیبیا کشتی حادثے کی تحقیقات کے لیے قائم کردہ کمیشن کے رکن کی حیثیت سے فرائض سرانجام دے چکے ہیں، اس لیے اخلاقی و قانونی طور پر مناسب نہیں کہ وہ اسی معاملے سے منسلک درخواستِ ضمانت کی سماعت کریں۔

درخواست گزار کے وکیل نے موقف اپنایا کہ ملزم ایک سال دو ماہ سے جیل میں قید ہے جبکہ اس پر جرم ثابت نہیں ہوا، اور کئی دیگر مقدمات میں اس کی ضمانت بھی منظور ہو چکی ہے؛ لہٰذا ٹرائل کورٹ کا فیصلہ آنے تک اسے ضمانت پر رہا کیا جائے۔ دوسری جانب سرکاری وکیل نے شدید مخالفت کرتے ہوئے بتایا کہ ملزم کے خلاف ایف آئی اے منڈی بہاؤالدین میں انسانی اسمگلنگ کے 30 مقدمات درج ہیں، اور اس پر لیبیا کے ذریعے نوجوانوں کو غیر قانونی طور پر یورپ بھیجنے والی اسی تباہ کن کشتی میں سوار کروانے کا سنگین الزام ہے جس میں متعدد پاکستانی جاں بحق ہوئے تھے۔ سرکاری وکیل نے استدعا کی کہ ملزم کسی رعایت کا مستحق نہیں، جس کے بعد عدالت نے کیس کی فائل چیف جسٹس کو بھجوا دی۔