سکیورٹی فورسز کا بلوچستان میں انٹیلی جنس بیسڈ آپریشن، 2 دہشت گرد ہلاک

بلوچستان میں سیکیورٹی فورسز کی جانب سے ’فتنہ الہندوستان‘ کے عسکریت پسندوں کے خلاف ٹارگٹڈ کارروائیاں مسلسل جاری ہیں، جس کے دوران کلی زائیک کے علاقے میں ایک انٹیلی جنس بیسڈ آپریشن میں دو دہشت گرد ہلاک جبکہ تین شدید زخمی ہو گئے۔ سیکیورٹی ذرائع کے مطابق یہ کارروائی بسیمہ کیمپ سے تقریباً 12 کلومیٹر شمال میں کلی زائیک اور کاغلی کے درمیانی علاقے میں دہشت گردوں کی موجودگی کی خفیہ اطلاعات پر کی گئی۔ شدید فائرنگ کے تبادلے میں ہلاک ہونے والے ایک اہم دہشت گرد کی شناخت مشتاق احمد عرف کوہ یار کے نام سے ہوئی ہے۔ فورسز نے کارروائی کے بعد دہشت گردوں کے ٹھکانے سے بھاری مقدار میں اسلحہ، ایمونیشن، میگزینز، دستی بم اور آئی ای ڈی (IED) بنانے میں استعمال ہونے والا سامان بھی برآمد کر لیا ہے۔ سیکیورٹی فورسز نے اپنے عزم کا اعادہ کیا ہے کہ بلوچستان میں دیرپا امن کے قیام اور دہشت گردی کے مکمل خاتمے تک یہ آپریشنز بلا تعطل جاری رہیں گے۔