پاکستان اور قطرموجودہ کشیدگی کم کرنے میں اہم کردار ادا کر رہے ہیں: اسماعیل بقائی

ترجمان ایرانی وزارتِ خارجہ اسماعیل بقائی نے اپنی ہفتہ وار نیوز کانفرنس میں بڑا بیان دیتے ہوئے کہا ہے کہ خطے میں جاری موجودہ کشیدگی کو کم کرنے اور امن و امان کے قیام کے لیے پاکستان اور قطر انتہائی اہم اور مثبت کردار ادا کر رہے ہیں۔ انہوں نے واضح کیا کہ ایران ان تمام کوششوں کے تناظر میں پاکستان اور قطر کے ساتھ مسلسل اور مضبوط رابطے میں ہے۔ اسماعیل بقائی نے زور دے کر کہا کہ ایران کوئی ایسا ملک نہیں ہے جو کسی کی دی گئی ڈیڈ لائن، دھمکی یا بیرونی دباؤ کے تحت اپنے فیصلے کرے، اور ایران کی ثابت قدمی و پائیدار حکمتِ عملی نے دشمن کے تمام غلط اندازوں کو ایک بار پھر باطل ثابت کر دیا ہے۔

• امریکہ کی جانب سے معاہدے کی خلاف ورزی: اسماعیل بقائی نے کہا کہ اسلام آباد مفاہمتی یادداشت (MoU) پر دستخط کے چند ہفتوں بعد ہی امریکہ نے جنگ بندی کی خلاف ورزی کی، جس کی وجہ سے باضابطہ مذاکرات کا سلسلہ ابھی شروع نہیں ہو سکا۔

• ڈیڈ لائن کی نفی: انہوں نے واضح کیا کہ مفاہمتی یادداشت کی بنیادی مدت صرف پابندیاں ختم کرنے اور جوہری مسئلے کے پرامن حل کے لیے تھی، اس میں نام نہاد 60 روزہ ڈیڈ لائن کی کوئی شرط شامل نہیں ہے۔

• آبنائے ہرمز پر عمان سے بات چیت: انہوں نے بتایا کہ آبنائے ہرمز میں محفوظ بحری آمدورفت اور باہمی طریقہ کار سے متعلق ایران اور عمان کے درمیان سنجیدہ مذاکرات اور مل کر کام کرنے کا عمل جاری ہے۔