وفاقی آئینی عدالت کا کارپوریٹ ٹیکس دہندگان کے حق میں بڑا فیصلہ

وفاقی آئینی عدالت نے کارپوریٹ ٹیکس دہندگان کے حق میں ایک اہم اور بڑا فیصلہ سناتے ہوئے سپر ٹیکس کے خلاف ٹیکس کریڈٹ کی ایڈجسٹمنٹ کو قانون کے مطابق بالکل جائز قرار دے دیا ہے، اور اس معاملے پر اسلام آباد ہائیکورٹ کے سابقہ فیصلے کو کالعدم کر دیا ہے۔ جسٹس عامر فاروق کی جانب سے تحریر کردہ 6 صفحات پر مشتمل تفصیلی فیصلے کے تحت عدالت نے نجی موبائل کمپنی کی اپیلیں منظور کر لیں۔ عدالتِ عالیہ نے واضح کیا کہ فائلنگ اور کٹوتی پر ملنے والے ٹیکس کریڈٹ سے سپر ٹیکس کو ایڈجسٹ کیا جا سکتا ہے، اور انکم ٹیکس آرڈیننس کی دفعہ 168 کے تحت حاصل ہونے والا ٹیکس کریڈٹ ایک الگ اور مسلّمہ قانونی حق ہے۔

عدالت نے اپنے فیصلے میں اہم نقطہ اٹھاتے ہوئے قرار دیا کہ کسی بھی ٹیکس دہندہ کو جائز ایڈجسٹمنٹ سے روک کر لمبے ریفنڈ کے عمل کی طرف دھکیلنا قانون کی منشا کے سراسر خلاف ہے، کیونکہ مالیاتی قوانین کی تعبیر ہمیشہ ٹیکس دہندگان کے فائدے اور سہولت کو پیشِ نظر رکھ کر کی جانی چاہیے۔ اس کے ساتھ ہی عدالت نے فیڈرل بورڈ آف ریونیو (FBR) کو ہدایت کی ہے کہ وہ نوٹس کے جواب میں ٹیکس دہندہ کے ایڈجسٹمنٹ کلیم کا قانون کے مطابق ازسرِنو جائزہے۔ واضح رہے کہ ایف بی آر نے نجی موبائل کمپنی کو سپر ٹیکس کی ادائیگی کا نوٹس جاری کیا تھا، جس پر کمپنی نے ایڈجسٹمنٹ کے لیے ہائیکورٹ سے رجوع کیا تھا، تاہم ہائیکورٹ کی جانب سے درخواست خارج کیے جانے کے بعد معاملہ آئینی عدالت کے سامنے آیا تھا۔