فراری کی پہلی الیکٹرک کار متعارف، رونمائی کے فوراً بعد تنقید کا طوفان

روم: پُرتعیش اور تیز رفتار اسپورٹس گاڑیاں بنانے والی دنیا کی مایہ ناز اطالوی کمپنی ’فراری‘ (Ferrari) کی تاریخ کی پہلی مکمل الیکٹرک کار منظرِ عام پر آتے ہی شدید تنقید کی زد میں آ گئی ہے، جس کے گہرے منفی اثرات عالمی مارکیٹ میں کمپنی کی پوزیشن پر بھی نمایاں طور پر دیکھے جا رہے ہیں۔

اطالوی زبان میں روشنی کے معنی رکھنے والی اس نئی الیکٹرک گاڑی کو ’لُوچے‘ (Luce) کا نام دیا گیا ہے۔ اسے ایپل کمپنی کے سابق چیف ڈیزائنر سر جونی آئیو کے تخلیقی وژن اور ڈیزائن کے تحت تیار کیا گیا ہے۔ تاہم، اس شاندار اشتراک کے باوجود گاڑی کا حتمی ڈیزائن اور مجموعی تصور صارفین اور آٹو موبائل ناقدین کی توقعات پر پورا اترنے میں بری طرح ناکام رہا۔

فراری نے اپنی اس پہلی الیکٹرک گاڑی کو روایتی اسپورٹس لک کے بجائے ایک بالکل نئے انداز میں پیش کیا ہےفراری کی تاریخ میں پہلی بار متعارف کرائی گئی یہ ایک پانچ نشستوں (5-Seater) والی الیکٹرک گاڑی ہے۔ کارکردگی کے لحاظ سے یہ گاڑی انتہائی غیر معمولی ہے، جو کمپنی کے مطابق محض ڈھائی (2.5) سیکنڈ میں صفر سے 96 کلومیٹر فی گھنٹہ کی طوفانی رفتار حاصل کرنے کی صلاحیت رکھتی ہے۔عالمی مارکیٹ میں اس الیکٹرک کار کی قیمت 6 لاکھ 40 ہزار ڈالر مقرر کی گئی ہے، جو پاکستانی کرنسی میں تقریباً 18 کروڑ روپے سے زائد بنتی ہے۔

گاڑی کو عالمی سطح پر متعارف کرانے کے لیے اٹلی میں ایک انتہائی پُرتعیش تقریبِ رُونمائی کا اہتمام کیا گیا تھا، جس میں اٹلی کی اہم ترین سیاسی و سماجی شخصیات سمیت ملک کے صدر اور عیسائی برادری کے روحانی پیشوا پوپ لیو نے بھی خصوصی شرکت کی۔ لیکن اتنی بڑی برانڈنگ اور وی آئی پی تقریب کے باوجود مارکیٹ کا ردِعمل فراری انتظامیہ کے لیے شدید مایوس کن ثابت ہوا۔

مارکیٹ نے فراری کی اس نئی ایجاد کو بری طرح مسترد کیا، جس کا فوری اثر کمپنی کی مالیاتی پوزیشن پر پڑاگاڑی کی باقاعدہ رونمائی کے محض ایک دن بعد ہی اسٹاک مارکیٹ میں فراری کمپنی کے شیئرز کی قیمت میں آٹھ (8) فیصد تک کی بڑی کمی ریکارڈ کی گئی ہے۔ معاشی ماہرین اسے سرمایہ کاروں کی شدید مایوسی اور مارکیٹ کے منفی ردِعمل کی واضح علامت قرار دے رہے ہیں۔

دوسری جانب نامور آٹو موبائل ناقدین، بڑے سرمایہ کاروں اور بعض اطالوی سیاسی شخصیات نے بھی گاڑی کے ڈیزائن اور اس کے فیملی کار والے تصور پر سنگین سوالات اٹھا دیے ہیں۔ سوشل میڈیا پر بھی روایتی فراری کاروں کے دیوانے اس کے منفرد لُک کو لے کر سخت تنقید کر رہے ہیں اور ملا جلا ردِعمل سامنے آ رہا ہے۔

گاڑیوں کے ماہرین کا کہنا ہے کہ الیکٹرک گاڑیوں (EVs) کی تیز رفتار عالمی مارکیٹ میں فراری کا یہ قدم تاریخی تو ضرور ہے، مگر کمپنی کو اپنی روایتی، گرجدار آواز والی اسپورٹس کاروں کے شوقین صارفین کو اس خاموش الیکٹرک ماڈل پر قائل کرنے کے لیے ابھی مستقبل میں مزید سخت محنت کرنا ہوگی