ایف بی آر نے کسٹمز افسروں کو غیر مجاز سوشل میڈیا استعمال سے خبردار کر دیا

فیڈرل بورڈ آف ریونیو (ایف بی آر) نے کہا ہے کہ سوشل میڈیا پلیٹ فارمز کو اتھارٹی کی پیشگی اجازت کے بغیر استعمال کرنے والے کسٹمز افسران اور اہلکاروں کے خلاف سخت تادیبی کارروائی کی جائے گی۔

سرکاری نوٹیفکیشن کے مطابق، ایف بی آر کی فیلڈ فارمیشنز نے مشاہدہ کیا ہے کہ متعدد افسران نے بغیر اجازت سوشل میڈیا پر سرگرم رہ کر سرکاری قواعد و ضوابط کی خلاف ورزی کی ہے۔ بورڈ نے ایسے طرز عمل کو “غیر اخلاقی رویہ” قرار دیتے ہوئے واضح کیا کہ یہ گورنمنٹ سرونٹس (کنڈکٹ) رولز، 1964 کے زمرے میں آتا ہے۔

ایف بی آر نے تمام فیلڈ فارمیشنز کو ہدایت کی ہے کہ وہ ایستبلشمنٹ ڈویژن کی جانب سے جاری کردہ متعلقہ آفس میمورنڈمز پر سختی سے عمل درآمد کو یقینی بنائیں۔ بورڈ نے کہا کہ قواعد و ضوابط کی مکمل پاسداری ہر صورت لازم ہے۔

نوٹیفکیشن میں خبردار کیا گیا ہے کہ ہدایات کی خلاف ورزی کرنے والے افسران کے خلاف تادیبی کارروائی کی جا سکتی ہے، تاکہ سرکاری اداروں کی نمائندگی کے دوران آن لائن مناسب پروٹوکول اور پیشہ ورانہ طرز عمل کو یقینی بنایا جا سکے۔

ایف بی آر کا کہنا ہے کہ یہ اقدام سرکاری اہلکاروں کو ڈیجیٹل پلیٹ فارمز کے استعمال کے دوران پیشہ ورانہ، ذمہ دارانہ اور اخلاقی رویہ برقرار رکھنے کی ترغیب دینے کے لیے ہے۔