گرگٹ سے بھی تیز تر رنگ بدلنے والے موبائل کی چھپر پھاڑ مقبولیت

سام سنگ کا یہ نیا فولڈ ایبل موبائل محض ایک اسمارٹ فون نہیں بلکہ ایک کشادہ ڈیجیٹل ورک اسپیس ہے، جو متعدد زاویوں سے فولڈ ہونے والی لچکدار اسکرین کی بدولت صارفین کو ایک بالکل نیا تجربہ فراہم کرتا ہے۔

اس جدید فون میں صارف بیک وقت کئی ایپس چلا سکتا ہے، بالکل اسی طرح جیسے کمپیوٹر اسکرین پر مختلف ونڈوز کھلی ہوں۔ مزید یہ کہ فون کو بلو ٹوتھ کی بورڈ اور ماؤس سے بھی جوڑا جا سکتا ہے، جس کے بعد یہ ایک منی لیپ ٹاپ کی شکل اختیار کر لیتا ہے۔

فون میں گوگل جمینی اسمارٹ اسسٹنٹ شامل ہے، جو ملٹی ٹاسکنگ، ایپس کے درمیان سوئچنگ اور کام کی ترتیب کو نہایت آسان بنا دیتا ہے۔ مکمل طور پر کھلنے پر فون انتہائی پتلا اور جدید ڈیزائن کا حامل نظر آتا ہے، جبکہ فولڈ ہونے کی صورت میں یہ قدرے موٹا محسوس ہوتا ہے، جیسے دو فون ایک ساتھ رکھے گئے ہوں۔

سام سنگ کا دعویٰ ہے کہ یہ ڈیزائن اور استعمال کا تجربہ پچھلے فولڈ ایبل فونز کے مقابلے میں کہیں زیادہ بہتر ہے۔
کیمرہ کے شوقین صارفین کے لیے بھی خوشخبری ہے، کیونکہ اس فون کے کیمرے Galaxy S25 Ultra کے معیار کے قریب ہیں، جو پہلے فولڈ ایبل فونز کی ایک بڑی کمی سمجھے جاتے تھے۔

اگرچہ کمپنی نے اس فون کی باضابطہ قیمت ظاہر نہیں کی، تاہم ٹیک ماہرین کے مطابق اس کی قیمت 2000 سے 2500 امریکی ڈالر کے درمیان ہو سکتی ہے، جو متوقع آئی فون 17 پرو میکس سے بھی زیادہ ہے۔

سام سنگ کے مطابق یہ فون خاص طور پر اُن صارفین کے لیے تیار کیا گیا ہے جو موبائل کو صرف تفریح نہیں بلکہ کام، تخلیق اور پروڈکٹیوٹی کے لیے استعمال کرتے ہیں۔ یہ انوکھا فولڈ ایبل فون حال ہی میں لاس ویگاس میں منعقدہ ایک ٹیکنالوجی شو میں نمائش کے لیے پیش کیا گیا، جبکہ اس کی محدود تعداد جنوبی کوریا میں فروخت کے لیے بھی دستیاب ہے