بھارت کے معروف اداکار اہلیہ سمیت خوفناک ٹریفک حادثے کا شکار

معروف بالی ووڈ اداکار اشیش ودیارتی اور ان کی اہلیہ روپالی بروآہ ریاست آسام کے شہر گوہاٹی میں ٹریفک حادثے کا شکار ہو گئے۔ بھارتی میڈیا کے مطابق یہ واقعہ رات گئے دی گوہاٹی ایڈریس ہوٹل کے سامنے پیش آیا، جہاں دونوں ہوٹل سے عشائیے کے بعد باہر نکل کر سڑک عبور کر رہے تھے کہ ایک تیز رفتار ایونجر موٹر سائیکل نے انہیں ٹکر مار دی۔

پولیس کے مطابق حادثے کے نتیجے میں اشیش ودیارتی، ان کی اہلیہ اور موٹر سائیکل سوار تینوں سڑک پر گر گئے اور شدید زخمی ہوئے، جنہیں فوری طور پر قریبی اسپتال منتقل کیا گیا۔ گیتانگر پولیس کا کہنا ہے کہ تینوں کو اسپتال میں داخل کر کے طبی امداد فراہم کی جا رہی ہے، تاہم اداکار اور ان کی اہلیہ کی حالت اب خطرے سے باہر بتائی جاتی ہے۔

اداکار اشیش ودیارتی نے اسپتال سے ایک ویڈیو پیغام کے ذریعے مداحوں کو اپنی خیریت سے آگاہ کرتے ہوئے کہا کہ وہ اور ان کی اہلیہ محفوظ ہیں، جبکہ روپالی بروآہ احتیاطاً ڈاکٹروں کی نگرانی میں ہیں۔ انہوں نے زخمی موٹر سائیکل سوار کی جلد صحت یابی کے لیے دعا کی اور اسپتال کے ایمرجنسی اسٹاف کی بروقت طبی سہولتوں پر شکریہ ادا کیا۔ مداحوں کی جانب سے اداکار کی جلد صحت یابی کے لیے دعاؤں اور نیک تمناؤں کا سلسلہ جاری ہے۔