فائزہ حسن کا صبا فیصل کے وائرل بیان پر ردعمل

فائزہ حسن، جو طویل عرصے سے ٹی وی اور فلم انڈسٹری سے وابستہ ہیں، حال ہی میں ایک نجی ٹی وی کے مارننگ شو میں بطور مہمان شریک ہوئیں۔ پروگرام کے دوران انہوں نے صبا فیصل کے اُس وائرل بیان پر بات کی جس میں صبا فیصل کا کہنا تھا کہ بہو کو سسرال میں سونے سے پہلے بھی اجازت لینی چاہیے۔

اس حوالے سے فائزہ حسن نے کہا کہ وہ ذاتی طور پر صبا فیصل سے کبھی نہیں ملیں، تاہم انہوں نے وائرل کلپ ضرور دیکھا ہے۔ ان کا کہنا تھا کہ انہوں نے اپنے کیریئر میں ڈراموں میں اکثر زہریلے اور منفی کردار ادا کیے اور وہ یہ سمجھتی تھیں کہ نند، ساس یا سسرالی مسائل جیسے کردار صرف فکشن تک محدود ہوتے ہیں، مگر جب انہوں نے ایسے کردار نبھائے تو ناظرین کے پیغامات سے انہیں اندازہ ہوا کہ بہت سے لوگ ان کہانیوں سے خود کو جوڑتے ہیں۔

فائزہ حسن نے مزید کہا کہ اب انہیں اس بات کا بخوبی ادراک ہو گیا ہے کہ جوائنٹ فیملی سسٹم میں واقعی بہت سی ناانصافیاں ہوتی ہیں جو سراسر غلط ہیں۔ ان کے مطابق یہ نظام اکثر زہریلا ثابت ہو سکتا ہے کیونکہ ہر رشتے کو ذاتی اسپیس کی ضرورت ہوتی ہے، جو جوائنٹ فیملی میں اکثر میسر نہیں آتی۔

انہوں نے واضح مؤقف اختیار کرتے ہوئے کہا کہ ان کے نزدیک جوائنٹ فیملی سسٹم کا واحد فائدہ مالی بچت ہے، اس کے علاوہ وہ اسے ایک صحت مند یا مثالی نظام نہیں سمجھتیں۔