اپنے بچوں کو ایکسٹرا میریٹل افیئر کے بارے میں بتائیں کہ یہ کتنا غلط ہے: فائزہ حسن

پاکستانی اداکارہ فائزہ حسن نے کہا ہے کہ والدین کو چاہیے کہ وہ اپنے بچوں کو بے وفائی اور شادی کے بعد تعلقات یعنی ایکسٹرا میریٹل افیئر کے بارے میں مناسب انداز میں آگاہ کریں۔

ایک حالیہ انٹرویو میں فائزہ حسن نے جنریشن زی کی پرورش اور نئی نسل کے زیادہ سمجھدار ہونے کے موضوع پر گفتگو کی۔ اس دوران ان سے سوال کیا گیا کہ کیا بچوں کو دھوکا دہی اور شادی کے بعد تعلقات کے بارے میں بتایا جانا چاہیے اور یہ سمجھایا جانا چاہیے کہ یہ کتنا غلط عمل ہے۔

اس کے جواب میں اداکارہ کا کہنا تھا کہ بچوں کو نرمی اور بالواسطہ انداز میں یہ بات سمجھائی جا سکتی ہے کہ دھوکا دینا یا بے وفائی کرنا غلط ہے۔ انہوں نے کہا کہ اگر کسی خبر یا ڈرامے میں اس طرح کا واقعہ سامنے آئے تو اس موقع پر اس عمل کی حوصلہ شکنی کی جا سکتی ہے، تاہم بچوں کو براہِ راست لیکچر دینا مناسب نہیں کیونکہ اس سے وہ چِڑ محسوس کرنے لگتے ہیں۔

فائزہ حسن نے کم عمری میں شادی کرنے والے نوجوانوں کو بھی مشورہ دیا کہ اگرچہ کم عمر میں شادی کرنا غلط نہیں، تاہم سب سے پہلے اپنی فلاح و بہبود اور مستقبل کے بارے میں سوچنا چاہیے۔

ان کا کہنا تھا کہ نوجوانوں کو شادی سے پہلے مالی طور پر خودمختار ہونا چاہیے اور اپنے کیریئر کو مستحکم بنانے کے بعد ہی اس اہم فیصلے کے بارے میں سوچنا چاہیے۔