دنیا بھر میں میٹا ایپ کے صارفین کو استعمال میں مشکلات

سوشل میڈیا کمپنی ’میٹا‘ کے زیرِ انتظام چلنے والے مقبول ترین عالمی پلیٹ فارمز فیس بک، انسٹاگرام اور میسنجر کی سروسز اچانک ڈاؤن ہو گئی ہیں، جس کے باعث دنیا بھر میں کروڑوں صارفین کو ان ایپس کے استعمال میں شدید مشکلات کا سامنا ہے۔

صارفین کے ڈیجیٹل پلیٹ فارمز تک رسائی کی مانیٹرنگ کرنے والی عالمی ویب سائٹ ڈاؤن ڈیٹیکٹر (Downdetector) کے مطابق، پاکستانی وقت کے مطابق شام تقریباً 6 بج کر 40 منٹ کے قریب دنیا بھر سے ہزاروں صارفین نے فیس بک اور انسٹاگرام کی سروسز یکایک متاثر ہونے کی شکایات درج کروائیں۔

 آؤٹیج کی سب سے بڑی اور پریشان کن خصوصیت یہ سامنے آئی کہ فیس بک اور میسنجر کے فعال اکاؤنٹس صارفین کی سکرینز سے خود بخود (Session Expired) ہو کر لاگ آؤٹ ہو گئے۔ دوبارہ لاگ ان کرنے کی کوشش پر صارفین کو پاس ورڈ غلط ہونے یا ‘سرور ایرر’ کے پیغامات موصول ہو رہے ہیں۔انسٹاگرام اور فیس بک موبائل ایپ استعمال کرنے والے دیگر صارفین نے شکایت کی ہے کہ ان کی نیوز فیڈز، ریلز اور اسٹوریز مکمل طور پر بلینک (خالی) ہو چکی ہیں اور نئی پوسٹس لوڈ نہیں ہو رہیں۔

 “میٹا کے تینوں بڑے نیٹ ورکس بیک وقت جام ہونے کے فوراً بعد صارفین کی ایک بہت بڑی تعداد نے متبادل مائیکرو بلاگنگ پلیٹ فارم ‘ایکس’ (سابقہ ٹویٹر) کا رخ کر لیا، جہاں #FacebookDown اور #InstagramDown کے ہیش ٹیگز سیکنڈز میں ٹاپ ٹرینڈ بن گئے ہیں، اور صارفین اپنی مشکلات کے اسکرین شاٹس اور میمز شیئر کر رہے ہیں”۔تکنیکی ماہرین کا کہنا ہے کہ یہ خرابی میٹا کے مرکزی بیک اینڈ سرورز یا ڈومین نیم سسٹم (DNS) میں کسی بڑی خرابی کی وجہ سے ہو سکتی ہے۔ میٹا انتظامیہ کی جانب سے سرورز کی بحالی اور اس عالمی تکنیکی خرابی کی باقاعدہ وجہ سے متعلق تاحال کوئی باضابطہ اعلامیہ سامنے نہیں آیا ہے۔