فیس بک صارفین کیلئے اہم انتباہ! پبلک پوسٹس سے رازداری کو خطرہ؟

فیس بک اپنے سرچ فیچر میں مصنوعی ذہانت (AI) پر مبنی ایک بڑی تبدیلی متعارف کرانے کی تیاری کر رہا ہے، جس کے بعد سرچ بار صرف الفاظ تلاش کرنے کے بجائے ایک چیٹ اسسٹنٹ کی طرح کام کرے گا۔ اس نئے فیچر کے تحت صارفین سالوں پرانی پبلک پوسٹس، تبصروں اور عوامی معلومات کو سوال و جواب کی صورت میں چند لمحوں میں تلاش کر سکیں گے۔ تاہم، ماہرینِ سکیورٹی نے خبردار کیا ہے کہ اس سے سائبر کرائم اور غلط معلومات کے پھیلاؤ کا خطرہ بڑھ سکتا ہے، کیونکہ اب سائبر مافیا اور فراڈ عناصر صارفین کی ذاتی معلومات کا باآسانی تجزیہ کر کے انہیں نشانہ بنا سکیں گے۔ ماہرین نے صارفین کو مشورہ دیا ہے کہ وہ فیس بک پر کچھ بھی پوسٹ کرنے سے پہلے سوچیں اور اپنے ڈیٹا کو محفوظ بنانے کے لیے پوسٹس کو ‘پبلک’ رکھنے کے بجائے ‘فرینڈز’ تک محدود رکھیں۔ اس کے لیے فیس بک سیٹنگز میں موجود ‘لمٹ پاسٹ پوسٹس’ (Limit Past Posts) کا ٹول استعمال کیا جا سکتا ہے، جو تمام پرانی پبلک پوسٹس کو صرف دوستوں تک محدود کر دیتا ہے۔