یورپی سائنسدانوں کا چاند پر بھیجنے کیلئے نئے اور منفرد مشن کا اعلان

یورپ کے سائنسدانوں نے جدید ٹیکنالوجی کو مزید مؤثر بنانے کے لیے چاند پر روبوٹس بھیجنے کا فیصلہ کر لیا ہے اور اس منصوبے کی باقاعدہ تیاریاں شروع کر دی گئی ہیں۔

سائنسدانوں کے مطابق اس مشن کا مقصد مستقبل کی خلائی مہمات کو آسان اور محفوظ بنانا ہے۔ منصوبے میں یونیورسٹی آف ملاگا کے سپیس روبوٹکس لیب کے محققین بھی شامل ہیں جنہوں نے سپین کے آتش فشانی جزیرے لانزاروتے پر تین جدید روبوٹس کی جانچ اور تصدیق کی۔

یورپی سائنسدانوں کا کہنا ہے کہ خلا میں بھیجے جانے والے یہ روبوٹس انتہائی مشکل اور زیرِ زمین ماحول میں خودمختار انداز میں کام کرنے کی صلاحیت رکھتے ہیں۔

ٹیم کا کہنا ہے کہ یہ مشن مشکل مگر اہم ہے، کیونکہ لاوا ٹنلز میں بے پناہ امکانات موجود ہیں، تاہم ناہموار زمین، محدود داخلی راستے اور خطرناک حالات کی وجہ سے ان مقامات تک رسائی ایک بڑا چیلنج ہے۔