توانائی کے ذرائع کی منتقلی، یورپی یونین نے اہم سنگِ میل عبور کرلیا

یورپ: یورپی یونین نے 2025 میں توانائی کے حصول میں ایک اہم سنگِ میل عبور کرتے ہوئے تاریخ میں پہلی بار ہوا اور شمسی توانائی سے فاسل فیولز کے مقابلے میں زیادہ بجلی پیدا کی۔

انرجی تھنک ٹینک Ember کے دسویں سالانہ یورپین الیکٹرسٹی ریویو میں رپورٹ دی گئی کہ سولر توانائی میں حیران کن اضافہ ہوا، جس کی بدولت گزشتہ برس قابلِ تجدید ذرائع نے یورپی یونین کی بجلی کی تقریباً نصف ضرورت پوری کی۔

اگرچہ ہائڈرو توانائی میں کمی کی وجہ سے گیس کے استعمال میں اضافہ ہوا، لیکن گیس پر انحصار میں طویل مدتی کمی برقرار رہی۔ رپورٹ کے مطابق ہوا سے پیدا ہونے والی بجلی یورپی یونین میں دوسرا بڑا ذریعہ بن گئی، جبکہ کوئلے کا استعمال تاریخی حد تک کم ہوا۔

یہ سنگِ میل اس وقت سامنے آیا جب امریکہ نے اقوامِ متحدہ کے موسمیاتی معاہدے سے دستبرداری اختیار کی اور وینزویلا کی تیل کی صنعت میں مداخلت کی۔رپورٹ کی مصنفہ ڈاکٹر بِٹریس پیٹرووچ کے مطابق، فاسل فیول پر انحصار میں کمی کے نتیجے میں صاف توانائی پر منتقلی کے واضح نتائج سامنے آئے ہیں۔ یہ سنگِ میل یورپی یونین کے توانائی کے مستقبل کی جانب تیز رفتاری کی عکاسی کرتا ہے۔