بین کٹنگ اور ایرن ہالینڈ کے گھر ننھے مہمان کی آمد، خوبصورت تصاویر بھی شیئر کر دیں

سڈنی: معروف آسٹریلوی ماڈل، ٹی وی پریزینٹر ایرن ہالینڈ (Erin Holland) اور ان کے شوہر، سابق آسٹریلوی کرکٹر بین کٹنگ (Ben Cutting) کے ہاں پہلے بچے کی پیدائش ہوئی ہے۔ کئی برسوں کی طویل، صبر آزمائش اور طبی جدوجہد کے بعد جوڑے نے اس خوشخبر کا اعلان سوشل میڈیا پر کیا۔

ایرن ہالینڈ اور بین کٹنگ نے اپنے رسمی انسٹاگرام اکاؤنٹس پر نومولود کے ساتھ دلکش اور جذباتی تصاویر شیئر کرتے ہوئے بتایا کہ ان کے ہاں بچے کی پیدائش 18 اگست کو ہوئی۔ تصویر کے کیپشن میں اپنے جذبات کا اظہار کرتے ہوئے انہوں نے لکھا: “اچانک سب کچھ سمجھ آنے لگا… ہمیشہ سے تم ہی تھے۔”

37 سالہ ماڈل نے اس سے قبل اپنے مداحوں کے ساتھ والدین بننے کے اس کٹھن اور دردناک سفر کی تفصیلات شیئر کی تھیں۔ انہوں نے انکشاف کیا تھا کہ وہ گزشتہ 5 سال سے بچہ حاصل کرنے کی کوشش کر رہے تھے، جس کے دوران انہیں 20 آئی وی ایف (IVF) سائیکلز، 5 ایگ کلیکشنز، 7 ایمبریو ٹرانسفرز، 4 اسقاطِ حمل (Miscarriages) اور ایک ایکٹوپک پریگننسی (Ectopic Pregnancy) جیسے انتہائی تکلیف دہ مراحل سے گزرنا پڑا۔

پی ایس ایل (PSL) اور عالمی کرکٹ لیگز کے باعث پاکستان میں بھی بے حد مقبول اس جوڑے کی اس خوشخبری پر شوبز اور کرکٹ کی دنیا سے تعلق رکھنے والی متعدد معروف شخصیات اور مداحوں کی جانب سے مبارکباد اور نیک تمناؤں کا سلسلہ جاری ہے۔