ایلون مسک کا وینزویلا کے عوام کیلئے انٹرنیٹ فراہمی بارے بڑا اعلان

ٹیسلا اور اسپیس ایکس کے چیف ایگزیکٹو ایلون مسک نے اعلان کیا ہے کہ ان کی سیٹلائٹ انٹرنیٹ سروس اسٹارلنک وینزویلا کے عوام کو 3 فروری تک مفت براڈبینڈ انٹرنیٹ فراہم کرے گی، تاکہ ملک میں جاری بحران کے دوران رابطہ اور مواصلاتی نظام بحال رکھا جا سکے۔

ایلون مسک نے یہ اعلان سوشل میڈیا پلیٹ فارم ایکس (سابقہ ٹوئٹر) پر کیا، جہاں انہوں نے کہا کہ یہ اقدام وینزویلا کے عوام کی حمایت اور معلومات تک ان کی رسائی کو یقینی بنانے کے لیے اٹھایا گیا ہے۔

یہ اعلان 3 جنوری کو امریکا کی جانب سے وینزویلا میں فوجی آپریشن کے بعد سامنے آیا، جس کے دوران صدر نکولس مادورو اور خاتونِ اول سیلیا فلوریس کو حراست میں لینے کی اطلاعات سامنے آئیں۔

اسٹارلنک نیٹ ورک کم بلندی پر گردش کرنے والے سیٹلائٹس (لو ارتھ آربٹ) کے ذریعے کام کرتا ہے اور سیاسی و سکیورٹی کی غیر یقینی صورتحال کے دوران انٹرنیٹ سروس برقرار رکھنے میں اہم کردار ادا کر سکتا ہے۔

ماہرین کے مطابق بحران کے دوران مواصلاتی سہولیات کی دستیابی عوام، صحافیوں اور امدادی اداروں کے لیے نہایت اہم ہوتی ہے، اور اسٹارلنک کی یہ سہولت معلومات تک رسائی اور رابطے کو ممکن بنانے میں کلیدی کردار ادا کر سکتی ہے۔