ایلون مسک نے واٹس ایپ کو غیر محفوظ قرار دے دیا

دنیا کے امیر ترین شخص ایلون مسک نے واٹس ایپ کی سکیورٹی پر ایک بار پھر تشویش کا اظہار کرتے ہوئے کہا ہے کہ یہ پلیٹ فارم محفوظ نہیں ہے اور صارفین کو ایکس چیٹ استعمال کرنے کی ترغیب دی۔

مسک کی یہ رائے اس وقت سامنے آئی جب بلوم برگ کی رپورٹ میں امریکا میں میٹا کے خلاف دائر ایک مقدمے کی تفصیلات بیان کی گئیں۔ اس مقدمے میں الزام لگایا گیا ہے کہ واٹس ایپ کی اینڈ ٹو اینڈ انکرپشن کے دعوے حقیقت پر مبنی نہیں اور کمپنی صارفین کے پیغامات تک رسائی رکھ سکتی ہے۔

مقدمہ آسٹریلیا، برازیل، میکسیکو اور جنوبی افریقہ کے صارفین کے ایک گروپ نے سان فرانسسکو کی امریکی ضلعی عدالت میں دائر کیا ہے۔ میٹا نے الزامات کو سختی سے مسترد کرتے ہوئے کہا ہے کہ واٹس ایپ گزشتہ دس برسوں سے سگنل پروٹوکول کے تحت محفوظ اینڈ ٹو اینڈ انکرپشن استعمال کر رہا ہے۔

فی الحال، مقدمہ عدالت میں زیر سماعت ہے اور حتمی فیصلہ عدالتی عمل کے بعد ہی سامنے آئے گا۔