10 سال میں انسان نما روبوٹس کی تعداد ایک ارب تک پہنچ جائے گی، ایلون مسک کا دعویٰ

الیکٹرک گاڑیاں بنانے والی معروف امریکی کمپنی ‘ٹیسلا’ کے چیف ایگزیکٹو آفیسر (CEO) ایلون مسک نے دعویٰ کیا ہے کہ آنے والے چند برسوں میں انسان نما روبوٹس (Humanoid Robots) کا استعمال دنیا بھر میں عام ہو جائے گا۔ چینی میڈیا کو دیے گئے ایک خصوصی انٹرویو میں انہوں نے پیشگوئی کی کہ آئندہ دس سالوں میں انسان نما روبوٹس کی تعداد 1 ارب، 15 برسوں میں 10 ارب اور اگلے 20 سالوں کے اندر 100 ارب تک پہنچ جائے گی، جس کے بعد ایک واحد انسان ہزاروں روبوٹس اور ڈیجیٹل ایجنٹس کو کنٹرول کرنے کے قابل ہو سکے گا۔

ایلون مسک نے مستقبل کے سماجی ڈھانچے پر بات کرتے ہوئے کہا کہ لوگ اپنے بچوں کی تعلیم و تربیت، گھر کے دیگر کام کاج، اور بالخصوص اپنے معمر والدین اور بچوں کی دیکھ بھال کے لیے ذاتی روبوٹس کا بڑے پیمانے پر استعمال کریں گے۔ انٹرویو کے اختتام پر انہوں نے چین کی تعریف کرتے ہوئے لوگوں کو مشورہ دیا کہ زندگی میں جب بھی موقع ملے چین کا دورہ ضرور کریں، اور اگر وقت کی کمی ہو تو کم از کم شنگھائی اور بیجنگ شہروں کا دورہ لازمی کریں۔