ایلون مسک کے دعوے نے ٹیکنالوجی کے میدان میں نئی بحث چھیڑ دی

ٹیکنالوجی کی دنیا کے نامور ارب پتی اور اسپیس ایکس (SpaceX) کے سربراہ ایلون مسک کے ایک حالیہ دعوے نے مالیاتی اور تکنیکی حلقوں میں نئی بحث چھیڑ دی ہے۔ ایلون مسک نے دعویٰ کیا ہے کہ اگر ان کی کمپنی اپنے طویل المدتی مقاصد حاصل کرنے میں کامیاب ہو گئی تو اس کی مالیت زمین کی مجموعی اقتصادی قدر (باقی پوری دنیا کی معیشت) سے بھی زیادہ ہو سکتی ہے۔ انہوں نے سوشل میڈیا پلیٹ فارم ایکس (X) پر ایک صارف کے تبصرے کا جواب دیتے ہوئے لکھا کہ لوگ شاید یہ نہیں سمجھ رہے کہ کامیابی کی صورت میں اسپیس ایکس کی مالیت پوری زمین سے بڑھ جائے گی۔ ایلون مسک نے واضح کیا کہ کمپنی کا بنیادی اور حتمی ہدف انسانوں کو زمین سے باہر چاند اور مریخ پر مستقل آبادیاں قائم کرنے کے قابل بنانا ہے، جس کے لیے کمپنی کا ‘اسٹار شپ’ (Starship) پروگرام مرکزی حیثیت رکھتا ہے۔ دوسری جانب، ماہرین اور معاشی تجزیہ کاروں کا کہنا ہے کہ یہ بیان مستقبل کے امکانات پر مبنی ایک پرجوش پیش گوئی ہے، تاہم اگر خلائی معیشت (Space Economy) نے غیر معمولی رفتار سے ترقی کی تو اسپیس ایکس تاریخ کی طاقتور ترین کمپنی بن سکتی ہے۔