خلائی تحقیق اور مصنوعی ذہانت میں بڑا انقلاب: ایلون مسک کی دولت ریکارڈ سطح پر پہنچ گئی

دنیا کے امیر ترین شخص ایلون مسک نے اپنی خلائی کمپنی اسپیس ایکس (SpaceX) کو اپنی مصنوعی ذہانت کی کمپنی ایکس اے آئی (xAI) کے ساتھ ضم کرنے کا اعلان کر دیا ہے۔ اس تاریخی کاروباری اقدام کے بعد نئی تشکیل پانے والی کمپنی کی مجموعی مالیت تقریباً 1.25 ٹریلین ڈالر بتائی جا رہی ہے، جو اس نوعیت کے سب سے بڑے معاہدوں میں شمار کی جا رہی ہے۔

ذرائع کے مطابق معاہدے کے بعد ایلون مسک کی ذاتی دولت میں تقریباً 84 ارب ڈالر کا اضافہ ہوا، جس کے نتیجے میں ان کی مجموعی دولت 852.5 ارب ڈالر سے تجاوز کر گئی ہے، اور وہ بدستور دنیا کے امیر ترین شخص بن گئے ہیں۔

معاہدے کی تفصیلات کے مطابق اسپیس ایکس کی تخمینی مالیت تقریباً 1 ٹریلین ڈالر جبکہ ایکس اے آئی کی مالیت 250 ارب ڈالر کے لگ بھگ ہے۔ انضمام کے بعد ایکس اے آئی کے شیئرز کو اسپیس ایکس کے شیئرز میں تبدیل کیا جائے گا، جبکہ دونوں کمپنیوں کے مصنوعی ذہانت، راکٹ ٹیکنالوجی، اسٹارلنک سیٹلائٹ نیٹ ورک اور دیگر جدید منصوبے ایک ہی پلیٹ فارم پر کام کریں گے۔

مالی اور ٹیکنالوجی کے ماہرین کا کہنا ہے کہ اس انضمام سے اسپیس ایکس کو مستقبل کے ڈیٹا سینٹرز، اے آئی سروسز اور خلائی منصوبوں میں نمایاں برتری حاصل ہوگی، جبکہ کمپنی کو ممکنہ طور پر عوامی سرمایہ کاری (IPO) کے لیے بھی تیار کیا جا رہا ہے، جس کا امکان رواں سال جون میں ظاہر کیا جا رہا ہے۔

تجزیہ کاروں کے مطابق یہ اقدام مصنوعی ذہانت، خلائی تحقیق اور عالمی کاروباری دنیا میں نئی راہیں کھول سکتا ہے، تاہم بعض ناقدین نے کمپنی کی غیر معمولی مالیت اور تخمینوں پر سوالات بھی اٹھائے ہیں۔